政情:经济动力向哪咤招手

 

政情:经济动力向哪咤招手(设计对白)

自由党一直强调要功能界别与地区直选「两条腿走路」,其实由该党分裂出嚟嘅经济动力亦都想咁做,不过由于佢哋起步迟过自由党,至今未出到啲知名度较高嘅直选新星。今次哪咤突然退党,据闻经济动力已第一时间同佢接触,话早喺经济动力脱离自由党前已经好欣赏佢,正所谓做生不如做熟,与其过档从未合作过嘅叶刘新党,不如加盟佢哋好过。

再者,其实哪咤同自由党闹翻嘅底因,係该党前主席田北俊盛传将复出再战立法会新界东直选,搞到佢上位无望,加盟经济动力就肯定冇呢个问题,只要成功喺区议会出线,经济动力绝对有钱有力撑佢出选立法会。消息话哪咤初步反应正面,但要等佢同自由党搞埋啲退党手尾后,先可以详细倾谈同做决定。

不过话说回来,哪咤讲过係因为唔认同自由党嘅亲工商立场而退党,经济动力嘅工商背景同包袱可能比自由党更重,呢段政治婚姻係咪成到事,真係冇人话得埋。

周太为刘健仪抱不平

另外,寻日我哋写咗自由党主席刘健仪(Miriam)差啲畀哪咤退党单嘢激到喊,自由党前副主席周梁淑怡寻日接受电台访问时,亦为Miriam抱不平,话Miriam之前无论几忙都好,只要哪咤出到声,都会亲自落将军澳撑佢啲活动,畀足资源同机会佢,所以哪咤今次无预警退党,Miriam真係好伤心。

周太又不点名批评哪咤过往甚少出席党内大小会议,其他人根本唔知佢对个党有何意见,到宣布退党时至话有好多不满。周太话该党有大把有能力嘅后生仔等住上位,依家哪咤退咗党,其他人反而有更多机会发声同曝光喎。

Money18新功能「18好路数」为你预测心水股票升跌机会率

上一篇: 下一篇: